Gal 1 | PONPDN | STEP | PAULUS wanporon amen kaidin san ren aramas akan, pil kaidin pan aramas akan, a pan Iesus Kristus o Kot Sam, me kotin kaiasadar i san ren me melar akan,

Galatians 1

1 PAULUS wanporon amen kaidin san ren aramas akan, pil kaidin pan aramas akan, a pan Iesus Kristus o Kot Sam, me kotin kaiasadar i san ren me melar akan, 2 O ri atail akan karos, me mi re i, at ranamau on momodisou en Kalesia kan: 3 Mak o popol san ren Kot Sam o atail Kaun Iesus Kristus en mi re omail; 4 Me kotin sokonpaude ki pein i ki dip atail, pwen dore kitail san ni me sued akan mi sappa, duen kupur en Kot o Sam atail. 5 Linan en ko on i kokolata! Amen. 6 I puriamuiki omail madan wuki san i, me molipe komail pan mak en Kristus, ap wuki on eu ronamau; 7 A sota eu mia. Ari so, akai mia, me kin kapinada komail, o irail men kalikame ronamau en Kristus. 8 A ma kit de tounlan amen san nanlan pan padaki on komail eu ronmau, me toror san ronamau, me se padaki on komail er, i en riala. 9 Duen me se indada mas o, iduen se pil puron inda: Ma amen pan padaki on komail eu ronamau, me toror san me komail aleer, i en riala. 10 Iaduen, i kin men kaperenda aramas akan de Kot? De i kin rapaki konekon ren aramas akan? Ma i men konekon ren aramas akan, i ap sota ladun Kristus. 11 I katitiki on komail ri ai kan, ronamau me i padakier, a sota tapi san ren aramas. 12 Pwe i sota ale san ren aramas amen, o sota me padaki on ia, a a koki don ia kasale pan Iesus Kristus. 13 Pwe komail roner duen ai wiawia en mas nan pun en men Sus akan, duen i kin morouo on momodisou en Kot lapalapia o kawe ir ala. 14 O i kakairida nin lamalam en Sus akan madan san me toto, me kit ti ta ieu o toun sap ta ieu, o i nantion kapwaiada padok en sam at akan. 15 A Kot lao kupureda, me kotin kilele ia di san ni kaped en in ai, o me kotin molipe ia ki a mak, 16 En kasale on ia sapwilim a Ol, pwe i en padaki on men liki kan duen i, i ap pitipit wiada o sota kalelapok ren uduk o nta. 17 O i pil so pwar lan Ierusalem ren irail, me wanporon akan mo i, a i kolan Arapien ap pil pure don Damaskus. 18 Ari, murin par silu i ap kodalan Ierusalem, pwen kilan Kepas. I ap mimieta re a ran eisoklimau. 19 A sota amen ren wanporon akan, me i kilan, Iakopus ta, ri en Kaun o. 20 A me i intin won komail, Kot me kotin mani, me i sota likam. 21 Muri i ap kola nan wein Sirien o Silisia. 22 A momodisou en Iudaa kan me mi pan kupta en Kristus sasa ia. 23 A i eta, irail roner, me i me kin morouo on kit mas o, i me kin padaki poson ansau wet, me a kin kaokaoe mas o. 24 Irail ap kalinanda Kot pweki nai.